A sexta edición do Festival de Cine Inclusivo homenaxea ao director galego Xavier Bermúdez

• O festival arrancará cunha retrospectiva sobre o director coa proxección de ‘León y Olvido’ e ‘Olvido y León’.
• Bermúdez foi o primeiro director español en rodar un filme cun actor protagonista con síndrome de down.

O Festival de Cine Inclusivo de Vigo arrancará a súa programación o vindeiro 12 de outubro cunha retrospectiva de Xavier Bermúdez, ao que o festival quere homenaxear por ser o primeiro director español en rodar un filme cun actor protagonista con síndrome de down. Durante o primeiro día de festival proxectaranse os filmes ‘León y Olvido’ (2004) e ‘Olvido y León’ (2021) e Bermúdez recollerá este premio honorífico das mans de Marta Larralde, actriz protagonista en ambos filmes.

‘Olvido y León’, estreada a comezos deste ano segue o rastro dos protagonistas de ‘León e Olvido’. Quince anos máis tarde Olvido acepta que os seus problemas non están relacionados coa relación que mantén co seu irmán xemelgo, León, que ten síndrome de down. O que realmente lle ocorre é que está baixo a influencia de poderes que non coñece e que tecen ao seu redor unha cárcere de insatisfacción persoal. Este ano o festival está dedicado á saúde mental, un tema que trata este filme ao amosar que o que realmente está sufrindo Olvido é un episodio de depresión.
Ambos filmes están protagonizados pola actriz viguesa Marta Larralde e Guillem Jiménez, quen faleceu recentemente. Este festival naceu co obxectivo de valorar proxectos cinematográficos realizados por e para a inclusión e Bermúdez foi un pioneiro nesta materia. Por ese motivo, se lle quere render esta merecida homenaxe.

O festival que se celebrará do 12 ao 16 de outubro no Auditorio do Concello, o Museo MARCO e o cine Salesianos, contará como cada ano cunha sección de curtas audioescritas e subtituladas para que persoas con discapacidade auditiva ou visual poidan gozar do sétimo arte, outro dos piares do evento.

Breve ‘bio’ sobre Xavier Bermúdez
Formado como realizador de curtametraxes e axudante de dirección, Xavier Bermúdez iníciase no campo da longametraxe con ‘Luz negra’ en 1992. Esta ópera prima logra a Mención Especial do Xurado no Festival de Alcalá de Henares. Ademais, a actriz Mónica Molina, unha dos seus protagonistas, recibe o Premio Especial do Xurado no Festival Internacional de Xixón polo seu traballo no filme.

En 1994 cofunda a produtora Xamalú Filmes. A súa seguinte longa de ficción, ‘Nena’ (1997), consegue a Mención Especial do Xurado en Alcalá de Henares e é seleccionado no Festival Internacional de Mar do Prata. Con todo, a súa consagración chega con ‘León y Olvido’ (2004), que obtén once premios internacionais e tres nacionais, entre os que se atopa o de Mellor Director no Festival Internacional de Karlovy Vary.

Tras este éxito roda ‘Rafael’ (2008), seleccionado no Festival de Málaga, o Festival Internacional de Montpellier e nas mostras de cinema galego de Fantasporto, Portugal e da Filmoteca de Madrid. Despois realizou ‘O ouro do tempo’ (2013), que participa na Sección Oficial do Festival Internacional de Karlovy Vary e consegue tres premios internacionais, nos festivais de Varna, Dürres e Calanda. A súa última longametraxe é ‘Olvido y León’, que continúa coa historia dos protagonistas da súa longametraxe de 2004, inaugurou a 25ª edición do Ourense Film Festival (OUFF) e acaba de ser seleccionada para o Festival Internacional de Singapur.

Crip Camp e Cuerdas gañan en 2020

Despois de cinco días de proxeccións e actividades ligadas ao audiovisual e a inclusión, o Festival de Cine Inclusivo de Vigo chega ao seu fin, dando a coñecer os gañadores desta quinta edición na que se proxectaron un total de 28 filmes.

Crip Camp de James Lebrecht e Nicole Newnham álzase co premio á mellor longa documental. Esta producción dos Obama conta a historia do campamento de verán para mozos con discapacidade organizado por hippies nas montañas de Catskills, que foi o berce da loita pola igualdade e os dereitos civís. Na sección de longas de ficción o premio recaeu no español Jose Luis Montesinos, coa súa ópera prima Cuerdas, na que narra a historia dunha moza en cadeira de rodas ante a ameaza inesperada durante o seu retiro nunha masía.

Nas diferentes seccións de curtametraxes os premios repartíronse da seguinte maneira: o galardón para a mellor curta de ficción foi para Paraíso de Mateo Cabezas, aínda que o xurado quixo conceder unha mención especial a Otra forma de caminar, de Laura Torrijos-Bescós; pola súa banda Orquesta Los Bengalas, de David Valero Simón alzouse co premio do festival de curtas subtituladas e audioescritas. O premio CREA á mellor realización foi para o galego David Fidalgo por Homomaquia e o premio AGAG ao mellor guión para Xoves de comadres da viguesa Noemí Chantada.

Este ano celebrouse a primeira edición do concurso de webseries online a través da páxina web do festival, que tivo un gran éxito de participación. O primeiro premio estivo moi reñido ata o final das votacións (que se pecharon o venres ás 12 da noite). Finalmente, os votos do público decidiron que o premio nesta categoría recaia sobre Indetectables, de Sonia Sebastián. En segunda e terceira posición, quedaron as viguesas Enfermedades raras e Hasta la vista! respectivamente.

Os trofeos que recibiron os gañadores na gala de clausura, que se celebrou esta tarde noite no Auditorio do Concello, foron elaborados pola escola de cantería de Pontevedra. Os galardóns, a modo de pequenas esculturas, están elaborados en granito silvestre cunha base de granito negro. As pezas simulan en planos xeométricos unhas mans que encadran e o ollo dentro e levan incluída unha placa gravada que detalla a modalidade de cada un dos premios. O galardón complétase cunha aportación económica en cada unha das categorías.

O xurado estivo formado por Humy Donado, Pablo Fontenla (CREA), Óscar Cruz (AGAG) para as Curtametraxes de ficción; Xudit Casas, Roi Cagiao, Jose Holgado para os documentais (tanto as longas como as curtas); e Moncho Lemos, Paula Cons, María Salgado para as Longametraxes de ficción.

Arranca o V Festival de Cine Inclusivo

Arranca a quinta edición do Festival de Cine Inclusivo de Vigo. Un dos eixos deste festival é traer a nosa cidade pezas audiovisuais que nos axuden a reflexionar de forma amena sobre a inclusión.

Este ano, marcado pola crise da COVID-19 o festival quere homenaxear ao persoal sanitario e dos servizos sociais. Por ese motivo, o filme escollido para a inauguración é o documental De chaque instant do francés Nicholas Philibert. O pase terá lugar no Auditorio do Concello ás 20.30, nel o director galo achégase ao proceso de formación dun grupo de enfermeiras para coñecer os seus desexos e medos. A do francés será a única peza fóra de concurso de toda a programación do festival. Esta proxección faise en colaboración coa Alliance Française de Vigo e o Institut française.

A inauguración correu a cargo do cónsul francés en Vigo, Jean-Baptiste Chassin; o director do AGADIC, Jacobo Sutil; o deputado provincial, Héctor Santos; e o alcalde de Vigo, Abel Caballero.

Previamente, ás 17.00 horas, podemos ver Crip Camp: a disability revolution, un documental producido polos Obama e que forma parte do concurso de longos documentais do festival, VIG-IN-DOC. Esta peza conta a historia do campamento de verán para mozos con discapacidade organizado por hippies nas montañas de Catskills que foi o berce da loita pola igualdade dos dereitos civís.

O acceso a todas as proxeccións e gratuíto, pero deberá retirarse o convite na billeteira do auditorio que abrirá media hora antes da proxección de cada filme. Dada a actual situación sanitaria os aforos están limitados a un cuarto da capacidade e tomaranse todas as medidas precisas (redución de aforo, uso obrigatorio da máscara, puntos de desinfección a entrada e saída dos auditorios etc.) para crear un evento seguro.

Votación de webseries inclusivas

O Festival de Cine Inclusivo de Vigo, que arranca a súa parte presencial a vindeira semana do martes 13 ao sábado 17, lanza o primeiro concurso de webseries online. Todo o público xa pode ver as cinco series que participan nesta primeira edición a través da web do festival e votar a súa favorita.

Desde a primeira edición o festival quixo visibilizar as webseries inclusivas galegas. Agora os organizadores cren que é o momento de convertela nunha sección competitiva e facela internacional. No ano 2016 o festival programou a presentación da webserie do director canario afincado en Galicia Veru Rodríguez, Mírame cuando te hablo en lingua de signos. Nas seguintes edicións presentáronse Generación Wifi da directora Julia Castro, webserie onde a protagonista está acompañada por personaxes con discapacidade que lle ensinarán a ver a realidade sen filtros. E Sorrisos transformadores de Noemí Chantada e Óscar Pardo, sobre a realidade dos nenos e nenas trans.

No concurso deste ano participan as webseries Enfermedades raras, Indetectables, Amor superdotado, #Sitcom e Hasta la vista!. Os directores das mesmas escolleron un capítulo que xa se pode ver online en: https://festivalcinevigo.es/webseries/

Despois de velas, todo aquel que o desexe pode escoller a súa favorita. O prazo para votar remata o venres 16 de outubro ás 23.55 horas.

Dolera e Marianico el corto a debate

O Festival de Cine Inclusivo de Vigo que se celebrará entre o 13 e o 17 de outubro debulla a súa programación de actividades paralelas ás proxeccións. Ao igual que o resto do festival, estas actividades pretenden crear conciencia sobre a inclusión no seu aspecto máis amplo.

Manuel Burque, guionista e actor na serie Vida Perfecta creada por Leticia Dolera, será o encargado de guiar o webinar ‘Vida perfecta e como rachar moldes’ da sección Coñece! do festival, dirixida a escolas. A serie acadou dous premios en Canneseries no ano 2019, á mellor serie e á mellor interpretación feminina que recaeu nas tres protagonistas: a viguesa Celia Freijeiro, Aixa Villagrán e a propia Leticia Dolera.

O sábado 17 ás 12.00 da mañá e de forma telemática terá lugar a Charla con AGAG (Asociación Galega de Guionistas). Baixo o título ‘El último show e a representación da terceira idade na ficción’. A serie El último show foi premiada no prestixioso Festival de Televisión de Vitoria-Gasteiz, onde foi cualificada polo xurado como “moderna e estimulante”. Na charla intervirán profesionais do sector audiovisual ligados a esta serie como son: Alex Rodríguez (creador desta serie e director de La casa de papel); Miguel Ángel Tirado, máis coñecido como Marianico el corto (actor); Luisa Gavasa (actriz); Sara Alquézar e Enrique Lojo (guionistas).

O mesmo día pero ás 16.00 horas, terá lugar a única actividade presencial do festival, o café con CREA (Asociación Galega de Profesionais da Dirección e Realización). Os directores Noemí Chantada (‘La mujer invisible) e Alex Cancelo (‘Aysha) participarán no coloquio ‘A responsabilidade dos creadores coa realidade’.

Abi Castillo deseña o cartel VIIFF20

Abi Castillo foi a artista escollida este ano polo festival de Cine Inclusivo para o deseño do cartel da súa quinta edición. O festival, que se celebrará entre o 13 e o 17 de outubro en Vigo, quere homenaxear aos profesionais da saúde e dos servizos sociais como queda latente no deseño da viguesa Abi Castillo. “Quixen facer unha homenaxe a todos e todas as que nos coidan. A miña intención era transmitir fortaleza facendo protagonista a unha muller sanitaria entre focos de cine que apuntan cara fóra, proxectando un futuro que espero sexa mellor e nos faga máis conscientes do que é realmente importante”, explica a deseñadora. Nas vindeiras edicións do certame a organización espera contar con outros artistas locais para o deseño do cartel promocional, unha maneira de dar visibilidade ao talento local e de facer partícipe a cidadanía do evento.

Esta edición, que vén marcada pola crise sanitaria xerada polo COVID19, está dedicada aos sanitarios e, por ese motivo, na selección dos traballos audiovisuais presentados a concurso déuselles maior puntuación a aqueles que axudasen a dar a coñecer e valorar o traballo dos sanitarios. Ademais, no acto inaugural proxectarase, fóra de concurso, Un chaque instant, o último documental de Nicolas Philibert.

Este documentalista francés está considerado un dos mellores de Europa e do mundo e tras estar ingresado no hospital e quedar abraiado da dedicación dos sanitarios que o atenderon, filmou Un chaque instant sobre a vocación dos enfermeiros. Esta proxección faise en colaboración coa Alliance Française de Vigo e o Institut française.

A Asociación Galega Audiovisual Inclusiva (AGAIN) organiza o V Festival Internacional de Cine Inclusivo de Vigo, co obxectivo de dar a coñecer, apoiar e valorar proxectos cinematográficos realizados por e para a inclusión, a igualdade e a difusión universal da sétima arte. O festival non sería posible sen o patrocinio e colaboración de diferentes Administracións e entidades privadas

X